林奕匡初为人父百感交集 创作新歌《摇篮下的歌》赠爱儿 歌词神预言初遇情景
Phil林奕匡初为人父，囝囝 Darrien 出世，自然感受良多，所以他特别创作了新歌〈摇篮下的歌〉并于今日上架，但想不到预先写好的歌词神预言了Phil的状况与心声，完全说中了他初次跟囝囝见面的画面与心情。
当初知道要做爸爸的时候，Phil已经灵感如潮涌，他回想道：「知道就嚟做爸爸嘅时候，已经有好多想法，即刻写咗好几首歌俾 Darrien，当时一心只係想用嚟记载同送俾 佢，至于有冇机会製作成一首歌，我自己都唔知道。」但当决定要做歌之时，Phil考虑到自己的歌库中，以钢琴为主的 ballad 作品为数不少，但以结他创作的则比较少，所以他就想到要以结他创作一首歌送给 Darrien，Phil续说：「今次就以写首歌送俾 囝囝为由，邀请咗新加坡音乐人 Marcus 一齐创作，佢嘅结他有一手，过去佢都同过唔同人合作。写〈摇篮下的歌〉嗰阵时我哋隔空合作，但好合拍，个零钟已经写好首歌。」
创作好旋律，交由林宝填词后，Phil便安排了录音日程，但人算不如天算，Darrien 竟然提早出世！Phil也始料不及，并说：「录音 schedule 一早决定咗，但唔知佢几时出世，呢个就係天嘅安排，啱啱佢出院嗰日我就去录音。其实好得意，情感上係满满，但嗰一刻其实好难录歌，因为情感泛滥，不停係唱唱下就喊。」Phil感情如此澎湃，全因林宝的歌词神预言了一切！Phil分享到：「我好锺意歌词中嘅几句：『今晚心情 怕你亦也许难听得懂几句 唯愿我枕边跟你伴随』 BB 啱啱出世嗰阵，我推住 BB 保护箱行出手术室，当时妈妈仲喺手术室，得我同佢独处半个钟，当时我帮佢影咗啲相同影片，其中一条片，我有讲到：『知道你唔知而家发生紧乜嘢事，亦都唔会有任何记忆，但係我会帮你拍低记载一下。』呢句歌词，就好係我嘅心声、心情，现实生活中我真係实现咗呢个画面。」
〈摇篮下的歌〉製作完成，Phil仍歌不离口，他笑言：「我唔敢话〈摇篮下的歌〉係佢嘅专属摇篮曲，但佢应该係听得最多，因为我成日唱俾佢听。其实我一早写咗英文嘅歌词，都可以话英文版係特别送俾佢，係我打从心底嘅创作，当中包括我嘅期待、盼望、未知、忧心、鼓励、陪伴，各种嘅心情。中文版就係同大家分享嘅，因为我相信每个做父母嘅都一定有呢啲感受。」
除了推出新歌，Phil亦分享了成为爸爸后的转变，他说：「作为新手爸爸，起初係有啲鸡手鸭脚唔知点算，我咁大力，佢咁脆弱，佢成日郁身郁势，我唔敢同佢斗力，怕整亲佢，惊又抱得佢唔舒服；而家佢硬净咗，我又多咗经验，两个开始有啲默契，佢一日比一日认到多啲我，每日都会俾多少少表情，我哋嘅 connection 明显愈嚟愈多，所以每日都愈嚟愈开心。」Phil表示，他已开始习惯当一位爸爸，人生好似大跃进，多了份责任，要懂得照顾人，而身边亲友，亦会叫他做「阿 Phil爸爸」，为此他也开心不已。
免责声明：本文章由会员“极目新闻”发布如果文章侵权，请联系我们处理，本站仅提供信息存储空间服务如因作品内容、版权和其他问题请于本站联系